په اړه يې

د علمي معاونيت په اړه

د لوړو زده‌کړو وزارت د معيارونو پر بنسټ، په هر پوهنتون کې علمي چارې د يو منظم اداري جوړښت له لارې تنظيمېږي، څو د تدريس، څېړنې او علمي پراختيا بهير په معیاري او اغېزناک ډول پر مخ ولاړ شي، په همدې چوکاټ کې، علمي معاونيت د پوهنتون له اساسي او کليدي اداري واحدونو څخه دی چې د علمي تګلارې جوړونې او تطبیق مشري پر غاړه لري.

علمي معاون د پوهنتون د علمي مقام په توګه د تدريس، څېړنې او نصاب د پراختيا په برخه کې د رهبرۍ او نظارت مسووليت لري، نوموړی د علمي پاليسيو د طرح، د درسي پروګرامونو د انسجام، او د څېړنيزو فعاليتونو د تنظيم له لارې ډاډ ترلاسه کوي چې ټول علمي فعاليتونه د ملي او نړيوالو معيارونو سره سم پر مخ ولاړ شي.

علمي معاونيت د تدريسي او څېړنيزو تګلارو په جوړولو کې مخکښ رول لري، څو د استادانو تدريسي چارې معیاري شي او د پوهنځيو درسي پروګرامونه د وخت له غوښتنو سره سم عيار پاتې شي، دا دفتر د پوهنځيو د تدريسي پلانونو، نصابونو او علمي پروګرامونو منظمه څارنه او ارزونه کوي او د اړتيا په صورت کې د اصلاح، تجديد يا تعديل وړانديزونه کوي.

د استادانو د تقرر، انفکاک او ترفيعاتو بهير هم د علمي معاونيت تر مستقيم نظارت لاندې وي، دغه راز، د درسي موادو او کتابونو د تهيې، د کتابتون د غني کولو او د محصلانو د اغېزناک علمي استفادې لپاره لازم اقدامات ترسره کېږي، څو تدريسي بهير له نړۍوالو معيارونو سره برابر شي.

دغه دفتر د کلني علمي پلان او څېړنيز پروګرام طرح او تطبيق په برخه کې کار کوي، د علمي شورا د غونډو په اجنډا جوړولو او پرېکړو کې فعاله ونډه اخلي او د نصابونو د بياکتنې او انکشاف بهير پر مخ وړي، همدارنګه، د علمي لوایحو او طرزالعملونو ارزونه کوي او د اړتيا په صورت کې د تعديل او تجديد وړانديزونه اړوندو مراجعو ته وړاندې کوي.

په ټوله کې، علمي معاونيت د پوهنتون د علمي هويت او کيفيت تضمينوونکې څانګه ده، د تدريس د معيار لوړول، د څېړنې پياوړتيا، د نصاب معیاري کول او د علمي ظرفيت انکشاف هغه اساس موخې دي چې دا دفتر يې د علمي تګلارې او منظم مديريت له لارې تعقيبوي.