معالجوي طب

معالجوي طب

د معالجوې طب پوهنځي لنډه پېژندنه

د ملي لوړو زده‌کړو مؤسسه د ټولنې د بې‌سارې اړتیا، د طبابت په برخه کې د ظرفیت لوړولو او د خپلو شریفو ولسونو پرله‌پسې غوښتنو ته په پام، د معالجوي طب پوهنځي د جوړېدو پریکړه وکړه، دا پوهنځی د اړینو قانوني پړاوونو له بشپړېدو او د معتبرو درسي نصابونو له تصویب وروسته، د کریدت سیستم پر بنسټ د لوړو زده‌کړو وزارت تر لارښوونې لاندې خپلې رسمي چارې پیل کړې.

د ملي معالجوي طب پوهنځی، د مؤسسې له پیل سره هم‌مهاله، خپل علمي او تحصیلي بهیر رسماً پیل کړ، دا پوهنځی د يو کال ستاژ په ګډون، يوولس سمستره نظري او عملي درسي بهير لري، تر څو د طب په برخه کې مسلکي او متخصص کادرونه وروزي، د لومړۍ دورې کانکور ازموینه کې ۹۰ کسانو برخه اخیستې وه، چې له دې جملې ۳۴ تنه د لوړو زده‌کړو مستحق وپېژندل شول او زده‌کړې یې رسماً پیل کړې.

اوس‌مهال دا پوهنځی د ټولنیزو علومو، پارا کلینیک مضامینو، داخله، جراحۍ او عامې روغتیا څانګو تر چتر لاندې، د مسلکي استادانو او مجهزو لابراتوارونو په لرلو سره، له بېلابېلو روغتونونو سره د عملي زده‌کړو د همکارۍ هوکړه‌لیکونه لري، همدا راز د کورنیو او غوره متخصصینو له خوا د ځانګړو سیمینارونو په مرسته، د محصلانو لپاره مناسب اکادمیک چاپېریال چمتو کړی، یو شمېر فارغان د تخصصي زده‌کړو په پړاو کې په کادري روغتونونو کې بوخت دي او یو شمېر نور یې اوس په مهمو روغتيايي ادارو کې د مهمو دندو مسؤولیت پر غاړه لري، سربېره پر دې، ګڼ شمېر محصلان هم‌دا مهال په علمي طبي مرکزونو او تدریسي روغتونونو کې خپلې ستاژي دورې ته دوام ورکوي او د فراغت په درشل کې دي.

د جوړېدو له ورځې تر ننه، دا پوهنځی د تدریس او علمي برخو کې د پام وړ پرمختګونه کړي او تل یې هڅه کړې چې د ملي معیارونو مطابق یو سالم اکادمیک چاپېریال رامنځته کړي. اوسمهال په دې پوهنځي کې ۶۸۰ محصلان تر زده‌کړې لاندې دي، چې د مجربو استادانو له خوا روزل کېږي، علمي جوړښت یې درې غیر فارغوونکي دیپارتمنتونه دي.

 درسي جوړښت

د ملي طب معالجوي پوهنځی د وزارت له خوا منظور شوی نصاب لري چې د يو سمستر PCB او يو کال ستاژ په ګډون ۱۱ سمستره (نظري او عملي زده‌کړې (درسي موده لري. محصلان د لومړیو سمسترونو پر مهال د پاراکلنیک مضامینو د عملي زده‌کړو لپاره د مؤسسې له مجهزو لابراتوارونو ګټه اخلي، خو د کلینیکي مضامینو د عملي زده‌کړې لپاره، د مؤسسې له خوا هغو روغتونونو ته معرفي کېږي چې له وړاندې یې ورسره هوکړه‌لیکونه کړي وي او هلته خپلې سکلې زده‌کړې تر سره کوي.

 لیدلوری  (Vision)

معالجوي طب پوهنځی ژمن دی چې د اسلامي شریعت او قانون، اخلاقو، عدالت، د اسلامي روحيې، ابتکار او انعطاف پر بنسټ، د تدریس، څېړنو او روغتیايي خدماتو له لارې یو ملي او سیمه‌ییز بااعتباره بنسټ واوسي.

 ماموریت  (Mission)

معالجوي طب پوهنځی د ژمنو او مسلکي استادانو په مرسته، د نويو تدریسي میتودونو، عصري ټکنالوژۍ او علمي څېړنو له لارې، هغه کادرونه روزي چې، د اسلامي او ملي اصولو په چوکاټ کې، د طبي خدماتو د وړاندې کولو وړتیا ولري.

 ارزښتونه

1. باکیفیته طبي زده‌کړو ته ژمنتیا
2. د ملي ګټو ساتنه
3. نوښت او مسؤولیت مننه
4. درناوی او رښتینولي
5. اسلامي او ملي ارزښتونو ته ژمنتیا
6. څېړنو او نوښت ته پاملرنه
7. اخلاقي او انساني اصولو ته پابندي
8. د اسلامي او ملي اصولو رعايت

 ستراتېژيک اهداف

1. د تدریسي کیفیت لوړول او درسي نصاب غښتلی کول
2. د استادانو او کارکوونکو علمي ظرفیت لوړول
3. د څېړنیزو برنامو پراختیا او برېښنايي زده‌کړو پیاوړتیا
4. د ملي او نړۍوالو اړیکو پراختیا او پیاوړتیا
5. د تحصیلي، روغتیايي او ټولنیزو خدماتو پراختيا
6. د اداري، مالي سیستمونو او اکادمیک بنسټونو پراختیا

 د شمولیت شرایط

د ملي لوړو زده‌کړو مؤسسې طب معالجوي پوهنځي کې د شاملېدو شرایط دا دي:

• مراجعه کوونکی باید د دولسم ټولګي فارغ وي
• د شهادت‌نامې یا درې کلنو نمرو کاپي ولري
• روغتيايي وضعيت يې ښه وي
• د ملي لوړو زده‌کړو مؤسسې په کانکور آزموينه کې ګډون وکړي
• د پوهنځي د شمولیت معیاري نمرې ترلاسه کړي
• اسلامي او ملي ارزښتونو او د مؤسسې داخلي اصولو ته درناوی ولري

1. د تضمین کیفيت کمېټه

2. د نصاب کمېټه

3. د نظم او دسپلین کمېټه

4. د E – Learning کمېټه

5. د علمي ورکشاپونو او تحقیق کمېټه

6. له ستراتیژیک پلان څخه د نظارت کمېټه

7. د آزموينو کمېټه

8. د فرهنګي او ورزشي چارو کمېټه