د ملي پوهنتون له راروان کنفرانس څخه يو شمېر لوړپوړو چارواکو ملاتړ څرګند کړ.

د ملي پوهنتون رییس، پوهندوی خالد احمد حبيب، د پوهنتون د علمي څېړنې او مجلې د رییس، عزیزاحمد فضلي، په ملتیا د اقتصاد له وزیر، قاري دین محمد حنیف او یو شمېر نورو لوړ رتبه امارتي چارواکو سره وکتل، یاده ليدنه د همغږۍ او علمي همکارۍ د پیاوړتیا په موخه ترسره شوه، چې په ترڅ کې یې د ملي پوهنتون له لوري د دایرېدونکي ملي علمي – څېړنیز کنفرانس «په افغانستان کې د درملو منطقي استعمال او راتلونکی لیدلوری» اړوند هر اړخیز معلومات له ښاغلي وزیر او نورو مشرانو سره شریک شول، په دې معلوماتو کې د کنفرانس موخې، علمي محورونه، د هېواد د علمي او څېړنیز بهیر لپاره یې ارزښت او د دولتي بنسټونو د ونډې اهمیت تشرېح شو.

 د ليدنې پر مهال د علمي څېړنو د ملاتړ، د پوهنتونونو او دولتي ادارو ترمنځ د اړیکو د پراختیا او د علمي کنفرانسونو د پایلو د عملي کولو پر لارو چارو هم خبرې وشوې، د اقتصاد وزیر او نورو چارواکو د ملي پوهنتون علمي هڅې وستایلې او د علمي او څېړنیزو پروګرامونو د ملاتړ په برخه کې یې د همکارۍ ډاډ ورکړ.