د علمي شوری مياشتنۍ ناسته وشوه.

د روان کال د ليندۍ مياشتې د علمي شوری ناسته، د ملي پوهنتون د رييس پوهندوی خالد احمد حبيب تر مشرۍ لاندې وشوه، چې په کې د شوری دايمي غړيو ګډون لاره.

 د تېرې مياشتې د راپور تر اورېدو وروسته، د خزاني سمستر نهايي آزموينو ته پر چمتووالي بحث وشو او ټيڼګار دا و، چې دا بهير دې له بشپړې روڼتيا سره پر مخ لاړ شي.

 په افغانستان کې د درملو د منطقي کارونې او راتلونکي لرليد، د ملي علمي – څېړنيز کنفرانس په تړاو، چې ټاکل شوې په نږدې راتلونکي کې ترسره شي، هم تفصيلي بحث وشو، مسوولينو له خپل اړخه د چمتووالي راپور وړاندې کړ، ښاغلي حبيب اړوندو څانګو ته سپارښتنه وکړه چې پاتې علمي او تخنيکي چارې دې هم ژر تر ژره بشپړې شي، تر څو د رسمي پړاوونو تر طی‌کولو وروسته يې د ترسراوي مرحله پيل شي.

 په ژمنيو رخصتيو کې د استادانو له لوري د لنډمهالو کورسونو پيلول، د کيفيت‌لوړاوي د معيارونو تطبيق او يو شمېر نور موضوعات د دې ناستې هغه بحثونه وو، چې په اړه يې وروستۍ پرېکړې وشوې.